Anos Luz é un proxecto transmedia cuxa protagonista é a poeta Luz Fandiño. A obra céntrase na poesía galega e nas diversas temáticas que entrelazan a súa vida, como a migración e o feminismo.
Fandiño é poeta e activista, nada en Santiago de Compostela en 1931. Con 91 anos amosa un claro compromiso con diversas causas importantes para ela. Criada nunha familia formada por mulleres, tivo que emigrar a unha idade temperá debido á ditadura franquista. Inicialmente o seu destino foi Arxentina e máis tarde Francia.
En América do Sur descubriu a súa paixón pola poesía, que define como o seu “salvavidas”, que lle permitiu expresar os seus sentimentos pola súa terra, a súa familia e o seu pobo.
No proxecto distínguense tres apartados: poesía, migración e feminismo, así como o percorrido transmedia da obra. A historia de Luz cóntase a través das plataformas escollidas e anímase aos usuarios a converterse en prosumidores que amplíen o mundo narrativo e contribúan á construción cultural de Santiago de Compostela. Esta proposta está pensada para conectar co público novo, ofrecendo un modelo de comunicación bidireccional que fomente a participación.
